Congress-in Haryana sorkar rin tawk lohna put luh tum
Haryana chief minister hlui leh Congress hruaitu, Bhupinder Singh Hooda chuan an party -in state-a BJP-JJP (Jannayak Janta Party ) ṭangrual sorkar rin tawk lohna motion put luh an tum tih a sawi.
Congress hruaitu chuan ṭangrual sorkar thlawptu independent MLA pahnih chuan sorkar an thlawpna hi an hnukdawk tih a sawi a, sorkar hian thlawptu a ngah tawk tawh lo niin a sawi a ni.
"Sorkar hi mipui leh MLA-ten an ringtawk tawh lo a, an thawhpui ngei party MLA ṭhenkhat pawhin sorkar eiru nasa ber ni hialin an sawi a ni," tiin Bhupinder Singh chuan a sawi. Hei vang hian chief minister Manohar Lal Khattar kaihhruai sorkar rin tawk lohna motion hi an pu lut ngei dawn tih a sawi.
Hooda hian sorkar rin tawk lohna motion put luh a nih theihna atana Assembly special session ko tura phutin, Governor chenna in panin kawng a lo zawh tawh bawk. Haryana Assembly budget session hi March 5 aṭangin neih ṭan a ni dawn a ni.
Farm law thar duh lohna lantir tura Delhi pan tum loneitute chunga a chet dan avangin Haryana sorkar hian sawisel a lo hlawh tawh hle a ni. Loneitu kalkhawmte chu tuia phuh an nih bakah, dan tumin an kalna tur kawngpuite an lo laichhia a ni.
Sorkar chetdan avang hian BJP thawhpui, JJP MLA te pawh an lungawi lo hle a, Delhi-ah kalin union home minister Amit Shah pawh an lo hmu tawh a ni. JJP MLA zinga panga vel chuan loneituten farm law sut tura an phutna hi an thlawp thu ualau takin an lo sawilang tawh bawk. Hei vang hian ṭangrual sorkar siam dun, BJP leh JJP inkar boruak pawh hi a ṭha lutuk lo a ni.