Shiv Sena-in Covid-19 chungchangah ṭawng fimkhur turin eptu party-te chah

Maharashtra-a Covid-19 hri kai an pun chhoh leh nasat chungchangah eptu party-te chu ṭawng fimkhur turin rorellai, Shiv Sena chuan a ti. 

Chief minister Uddhav Thackeray chuan Pathianni khan state mipuite chu Covid-19 hri leng chungchanga sorkarin kaihhruaina a siamte zawm ṭha tura ngenin, ni 15 chhungin an state dinhmunte uluk takin an ennawn a, a ṭul dan azirin lockdown puan leh a ngai maithei tih a lo sawi tawh a ni. 

BJP leader Pravin Darker chuan CM thu a sawizuinaah, sorkar chuan mipuite rilruah hlauhna a siam tur a ni a, roreltu rawng tak ang maiin a che tur a ni lo tiin a sawi. Hei hi nimina Shiv Sena chanchinbu, Saamaa editorial-ah chhangin, eptute chu Covid-19 hri leng mek chungchangah ṭawng fimkhur turin a chah a, hri leng chu politics khelhna hmanruaa hman tum lo turin a ti. "Politics khelhna tur chuan kan damchhung hun kan la nei", tiin a tarlang. 

Chief minsiter Uddhav Thackeray chuan nimin khan Covid-19 hri leng dinhmun thlirin Brihanmumbai Municipal Corporation (BMC) official leh commissioner-te  meeting a neihpui. 

State chhunga hri leng an pun chhoh leh tak avangin district eng emaw zatah khuahkhirhna siam thar a ni leh tawh a; school, college leh coaching class-te pawh hmun tam takah khar leh rih a ni. Hri leng laka invenna tura kaihhruaina siamte pawh khauh zawka kenkawh a ni a, BMC chuan pawnchhuahnaa hmai tuamna vuah lote pawisa a chawitir aṭangin Rs nuai 28 a lalut tawh. 

Health minister Rajesh Tope chuan mipuite chu an state dinhmun hrethiam a, hri dona kawnga sorkar thawhpui ṭha turin a ngen a, lockdown puan leh chu an state-in a zo dawn lo tih sawiin, inkharkhipna leh a ngaih lohna tura theihtawp chhuah ṭheuh turin a ngen. 

Ram chhunga state ṭhenkhatah  hri kai an pun chhoh leh tak avangin Thawhṭanni khan union home minister Amit Shah hoin  review meeting neih a ni. 

He meeting-ah hian union health minister Harsh Vardhan, home secretary Ajay Bhalla, health leh home ministry-a top official-te an tel. Tun hnaia hri kai an pun zualna state-te dinhmunte thlirin, hri darh zel tur venna kawnga puih an nih theih dan turte sawiho a ni. 

Ram pumah hri lengin ziaawm lam panin, state tam zawkah hri kai hmuh chhuah an tlakhniam zel laiin, state ṭhenkhat - Maharashtra, Kerala, Punjab, Chhattisgarh leh Madhya Pradesh-ah chuan tun hnaiah hri kai hi an pung chho chak leh hle.