Uttarakhand-a chhiatna thlenga hmuh zawh lohte thiah puang dawn

Uttarakhand Chamoli district-a vurtlang puak vanga tuilian thlengin chhiatna a thlena ruang la hmuh zawh loh mi 136-te chu thiah an puang dawn niin official-te chuan an sawi.

February 7-a upper Himalaya-a vurtlang puak vangin Alaknanda leh Dhauliganga luite chu nasa takin a lian a, kha vang khan mi sang chuang chu hmun him lamah an insawn. Tuilian khan hydroelectric station bakah lei panga a len chhia a ni. 13.2 mw Rishi Ganga hydel project chu a chhe vek a, Tapovan-Vishnugad hydel project chu a tichhe nual bawk.

Chhiatna thlen hnuah khan pawl hrang hrangin chhawmdawl leh ṭanpui hna an thawk nghal a, state leh national disaster response forces, Army, Navy leh Air Force bakah ITBP, tualchhung police leh paramilitary troop-te chuan chhum lo chat loin ṭanpui hna an thawk a ni.

Thawhṭanni thleng khan ruang 68 an hmu tawh a, 136 chu chin hriat lohin an la awm. Uttarakhand-ah hian kum 2013 pawh khan tuilian leh leimin nasa tak a lo thleng tawh a, Kedarnath hmuna chhiatna thlengah khan mi 5,700 lai an thi a, kha kha kum 2004 Tsunami hnua India rama chhiatna thleng rapthlak ber zinga mi a ni.