JeM firfiak nena inbeihnaah sipai pali thi
Pakistan firfiak pawl, Jaish-e-Mohammad (JeM) firfiak-in thihchilh bomb hmanga Jammu and Kashmir-a Pulwana district-a CRPR convoy a beihnaa sipai 40 an thih hnuah, Pathianni zan khan Pinglan area-a JeM firfiak nena inbeihnaah sipai pali an thih belh leh. Sipai pahnihin hliam an tuar bawk.
Pulwana district-a Pinglan area-ah JeM firfiak an awm thu an dawn avangin Pathianni zan khan security force-te chu beihpui thlak turin an thawkchhuak nghal a ni. Security joint team ten beihpui an thlaknaah hian Army 55 Rashtriya Rifle, CRPF leh J&K Police hnuaia Special Operation Group (SOG) te an tel. A hmun an thlena firfiak ho an dap laiin firfiakte hian an lo kap a ni.
Security force-te hian kap let ve nghalin darkar 12 zet an inkap zui a, firfiak pahnih an kaphlum a ni He inbeihnaa sipai pali thi zingah hian Major pawh a tel a, civil mi pahnihin nunna an chan bawk. Civil mi pahnih thite hi firfiakte tawmna in neitute nia sawi an ni. Sipai pali thite hi RR sipaite an ni.
Firfiak pahnih kahhlum zingah hian February 14-a CRPF convoy beihnaa a ruahmantu ber nia sawi, Abdul Rasheed Ghazi, Kamran tia hriat chu a tel. Nimina an inbeihna hmun hi February 14-a CRPF convoy beihna hmun aṭanga km 10 vel chauha hla a ni. Kamran hi Pakistan mi niin, Afghan war veteran leh IED expert a ni a, CRPF convoy beitu Adil Ahmed Dar pawh training a lo pe tawh nia sawi a ni bawk.
Ni nga chhungin firfiak vangin sipai 45 thi
February 14-a JeM firfiakin CRPF convoy a beih vangin sipai 40 in nunna an chan a, hemi hnu hian Mjor Chitresh Singh Bisht chuan J&K-a Naushera district-a India leh Pakistan inri-na, Line of Control (LoC)-a firfiakte bomb kam a sut tumnaah bomb hi a puah zui avangin a nunna a chan bawk. Major Bisht hi nupui nei mai tur a ni a, nimin khan a ruang hian an khua, Dehradun a thleng a ni. Pathianni zana firfiakte nen inbeihnaah hian sipai pali-in nunna an chan leh bawk. Ni nga chhung lekin firfiakte vangin India sipai 45 zetin nunnas an chan phah a ni.