J&K-ah sipai thiar nan mo-tor hman chhunzawm dawn

Ministry of Home Affairs chuan kar kaltaa Jammu and Kashmir-a CRPF sipai 2,500 dawn bus 78 zet hmanga a ruala tlantir an nih chungchangah zawhna te awm mah se, sipaite hruaina atan hian motor chu hman chhunzawm zel a ni dawn tih an sawi a, hemi rual hian sipaite phurtu motor-te hi boruak aṭanga vilna ṭha zawk pek an nih tur thu a sawi. 

Jammu-Srinagar sector-a paramilitary force-te thiarna atana helicopter hman rawtna chu sorkar laipuiin a hnawl nia sawi a ni a, Home Ministry chuan sipaite thiarna atana motor hman chu ala pawimawhin hman chhunzawm zel a ni dawn a ni, a ti. 

J&K Police DGP hlui, Kuldip Khoda chuan ṭum khata sipai phurtu motor tam tham tak tlantir an nih chungchangah hian zawhna siamin, Kashmir ang hmun him loah chuan sipai chuanna motor hetianga tam hi a ruala kaltir phal a ni tur a ni lo, a ti. Sipai convoy hi 78 zet niin, a zuitu motor dang nen phei chuan 85 zet an ni tih sawiin, hetizat a rual a tlantir chu ven pawh thil harsa tak a nih thu a sawi. Thuneitute chuan ṭum khatah motor hi 12 vel chauh inzui phalsak se la, hei pawh hi a sir tin aṭangin venhim an ni bawk tur a ni, a ti. Escort-tu motor-te chuan an karah motor dang tlakzeh an phal tur a ni lo, a ti bawk. February 14-a sipai convoy beitu,  Adil Ahmad Dar hian kawng sir vei lam aṭangin convoy hi rawn zawmin bus pakhat chu suin a bomb phurh a tipuak zui a ni. 

Jammu and Kashmir Chief Minister hlui Mehbooba Mufti-i pawn CRPF te convoy-a kal phalsak an nih chhan chu a lo zawt tawh bawk.  

Jammu and Kashmir National Highway-ah hian kum 2013 aṭang khan sipaiten ṭum 11 beih an lo tawk tawh a, sipai 58 in nunna an chan tawh a ni. Heng inbeihna tam zawk hi Srinagar-South Kashmir highway-a thleng a ni.