Amit Shah-an BJP manifesto-ah CAB telh tum BJP sorkar leh chuan CAB pass ngei a tiam

Bharatiya Janata Party (BJP) president Amit Shah chuan Citizenship Amendment Bill, 2016 chu Lok Sabha inthlanpui neih tura an party manifesto-ah telh tum a nih thu a sawi a, inthlanpuiah hian BJP an sorkar leh a nih chuan he bill hi pass ngei a tiam bawk. 

Ram pathum - Bangladesh, Pakistan leh Afghanistan aṭanga India rama rawn pem lut, Muslim sakhaw ni lo sakhaw dang zawmtute India khua leh tui nihna pek theihna tur, Citizenship Amendment Bill,  2016 hi Parliament Budget session neih zawh takah khan Lok Sabha-ah pass a ni a, mahse Rajya Sabha-ah pharh hman a nih tak loh avangin a tawp(lapse) ta a ni. He bill hi pass tur chuan sorkar tharah a bul aṭanga ngaihtuah ṭhat leh a ngai dawn a ni. 

Hmarchhak bialah CAB hi nasa taka dodal a ni a, eptu party ṭhenkhat pawhin an dodal bawk. Bill dodalna lantir hian vawi tam tak nawrh huaihawt a ni. 

BJP President hian Pathiannia-a Guwahati-a BJP state office, North Lakhimpur-a Bhoomi Puja ceremony an hman chu telpuiin, thu a sawinaah CAB chungchang hi a sawichhuak a ni. Shah chuan, " Kan manifesto-ah Citizenship Amendment Bill hi kan telh dawn a ni. Hei hi hmarchhak tan chauh ni lo, ram puma raltlante tan a ni. State hrang hranga raltlante hi an rawn kal a, khawi lamah nge an kal leh zel ang? Assam leh hmarchhak state dangte chauh chuan he phurrit hi an phur dawn bik lo a ni", a ti. He Bill hmang hian Assam ram chin leh a leilung fate chu humhalh thei an ni dawn a ni, a ti bawk. Citizenship Bill tello chuan Assam mipuite chu dinhmun hlauhawm takah an ding zawk dawn a ni, a ti. An sorkar leh chuan Prime Minister Narendra Modi chuan Bill hi a chhawpchhuak leh ngei dawn tih a sawi. 

Rajya Sabha-a CAB pharh a ni hman loh chungchangah Shah chuan eptu party-te a phuh a, Congress, Asom Gana Parishad (AGP) leh Mamata Banerjee-i te chu thu dik lo thehdarhah a puh bawk a ni. 

"Majority kan neihna Lok Sabha-ah chuan awlsam takin kan pass a, mahse Rajya Sabha-ah majority kan nei lo a ni. Eptu party te chu lo hlim viau lo turin ka hrilh duh. BJP hian sorkarna a chang leh ngei dawn a, Rajya Sabha-a majority neitu pawh a inthlak dawn a ni", tiin Shah chuan a sawi.