US embassy-in Delhi CM leh Dy CM tel tir hnial lo

US First Lady Melania Trump-in Delhi sorkar school a tlawh tura official tel tur zingah Delhi chief minister Arvind Kejriwal leh a deputy chief minister Manish Sisodia-te hming chu paih a ni a, hei hian sawizui a hlawh hle.

Melania Trump hian Delhi-a AAP sorkarin kum 2018 aṭanga a kalpui ṭan, sorkar school-a happiness class an kalpui dante enin, zirlaite a kawm nghal dawn a ni.

A tirah chuan Kejriwal leh Sisodia-te hi school-a Melania Trump lo dawngsawng tur leh, Delhi sorkarin happiness class a telh chungchangte pawh lo hrilhfiah tura tih an ni. Mahse list hi siamṭhat a nih hnuin AAP hruaitu pahnihte hming hi paih a ni leh  a, list hi BJP sorkar thurawn anga siamṭhat niin AAP chuan an puh. 

US embassy chuan CM Kejriwal leh a deputy Sisodia-te hi First Lady-in school a tlawh turah an tel hnialna a nei lo tih a sawi. US embassy thupuangtu chuan, "CM leh Deputy CM-te tel ve hi hnialna kan nei lo a, hemi rual hian he programme hi political event a ni lo tih min hriatthiam pui avangin pawhin kan lawm hle. Kan dah pawimawh ber chu zirna, school leh zirlaite an ni," a ti. 

Delhi-a AAP sorkar hian kum 2018, July thla aṭang khan happiness class hi sorkar school-ah a siam ṭan a ni. Class I-VIII zirlaite chuan nitin minute 45 chhung 'happiness class' hi an nei ṭhin a, hemi chhung hian hun zangkhai taka hmanpui ṭhin niin, thawnthu sawi, meditation leh zawhna leh chhanna hunte an hmang ṭhin. Nursery leh kindergarten zirlaite pawhin 'happiness class' hi kar khatah ṭum hnih an hmang ṭhin.