Nitin mi 5000-in Kartarpur Sahib An tlawh phalsak turin ngen

India chuan Pakistan hnenah biakzina Kartarpur Sahib tlawh duh tam tak an awm thu sawiin, nitin mi 5,000 hnenah ramri kana he hmun tlawh phalna pe turin a ngen. 

Nimin khan India leh Pakistan hian Kartarpur Corridor chungchanga inbiakna hi an chhunzawm leh a, he hunah hian Pakistan hnenah ngenna hi a siam a ni. Inbiaknaah hian SCL Das Ministry of Home Affairs-a Joint Secretary (Internal Security) chuan India palai zinte hi a ho a, Deepak Mittal, Ministry of External Affairs-a Joint Secretary (PAI-Pakistan, Afghanistan and Iran) pawh India aiawh hian a kal bawk. 

Kartarpur Sahib hi India ramri bul, Pakistan-a Narowal district a awm a ni a, India ram aṭang pawhin a hmuh theih. Sikh sakhaw hmuchhuaktu, Guru Nanak-a awmna ṭhin a nih avangin Sikh sakhaw zuitute tana hmun pawimawh leh hmun thianghlim a ni a, tlawh turin mi tam tak an kal fo ṭhin.