Karnataka : Ninganiah ṭangrual sorkar fiah dawn

Karnataka-a Congress-Janata Dal Secular ṭang­rual sorkar chu Ningani hian Assembly House-ah sorkarna siam chhunzawm zel turin MLA thlawptu a ngah tawk em tih fiah a ni dawn. 

Ṭangrual sorkar MLA 18 zet chu helin spea­ker hnenah banna an thehlut tawh a, hei vang hian sorkar dinhmun hi a derthawng hle. Banna thehlutte hi Congress-JDS MLA 16 leh ṭangrual sorkar thlawptu independent MLA pahnih an ni. 

Chief minister HD Kumara­swamy chuan MLA eng emaw zatin banna thehlut mah se a kaihhruai sorkar dinhmun chu a la nghet ṭha tawk tih a sawi a, thlawptu a ngah tawk tih fiah pawh a ngam thu a lo sawi tawh. Congress hruaitu Siddara­maiah chuan, state assembly agenda chungchang siamtu panel-te meeting a neihpui hnuah, sorkar fiah hun tur hi an rel a;  July 18, Ningani chhun dar 11-ah floor test neih a ni dawn ta a ni. CM hlui Siddaramaiah pawhin ṭangrual sorkar chuan fiahna hi a paltlang ngei dawn tih a sawi. 

Hetihlai hian eptu party, BJP pawhin nimin khan sorkar rin tawk lohna motion an thehlut ve nghal bawk. Assembly Speaker Ramesh Kumar chuan MLA-te banna thehluh hi a la pawmsak lo a, kar kal ta Zir­tawpni khan thutlukna siam tur chuan hun a la mamawh belh tih Supreme Court a hriattir a ni. Court pawhin Thawhlehni hma chu thutlukna siam lo turin a lo hrilh tawh bawk. 

Speaker-in MLA-te banna hi a pawmsak a nih chuan Congress-JDS ṭangrualin MLA an neih zat hi 118 aṭangin 100-ah a tla thla dawn a, majority mark pawh 113 aṭangin 105 ah tlahniam ang. Eptu pawl BJP chuan member 105 nei mekin, independent MLA pahnihten an thlawp bawk a ni.