Tuilian vangin Bihar state-ah mi 4 thi tawh

Bihar State-a fur ruahtui sur nasa vanga tuilianin district pakuaa block 55-ah chhiatna hrang hrang a thlen a, mi 17,96,535 vel nunphung a khaihlak bakah mi paliin nunna an chan tawh.

Bihar chief minister Nitish Kumar chuan district hrang hranga tuilianin a nghawngna hmunte hi (aerial survey) drone hmangin a enfiah a, water resources minister Sanjay Jha, chief secretary Deepak Kumar, additional chief secretary (Water Resources department) Arun Kumar leh disaster management department principal secretary Pratyaya Amrit-ten CM survey hi an ṭawiawm.

Tuilianin a tihbuai district-ahte hian chhanchhuah leh chhawmdawl hnathawk turin National Disaster Response Force (NDRF) leh State Disaster Response Force (SDRF) team 13 tirh an ni a, relief camp 152-ah mi 45,053 dah an ni tawh, commu­nity kitchen 251 siam a ni bawk.

Chief Minister chuan tuilian vang hian high-level meeting a ko a, tuilianin a nghawngte leh chhawm­dawl hnathawh dante an thlir­let a, ṭanpuina pek dan turte an sawi ho. Ruahsur nasa vang hian Bagh­mati, Kamla Balan, Lalbakeya, Adh­wara leh Mahananda luite chu an kuang pela luangin hlauhawm chhin­chhiahna an pel vek tawh a ni.