UP-ah bawng thih vangin officer pariat suspend
Uttar Pradesh-a bawng vulhna hmuna bawng an thih avangin state sorkar chuan Ayodhya leh Mirzapur district-a officer pariatte chu an hna aṭangin a suspend. District danga official ṭhenkhatte pawh warning pek an ni nghal bawk.
Bawng vulhna hmuna bawng thih chhan hi chhui chian mek a ni a, bawng venhim hi Uttar Pradesh sorkar chuan an sorkar agenda pakhat-ah a nei a ni.
Bawng thih chhan hi an rilṭam vang nia rin a ni a, an chenna hmun hi ruah leh ṭek lakah a him tawk lo nia sawi a ni bawk. Kum 2017 aṭang khan chief minister Yogi Adityanath kaihhruai BJP sorkar hian bawng venhimna kawnga hmalak hi an state sorkar agenda pawimawh berte zingah a telh a ni. Thla tam tak liam ta khan khawlai bawng, chenna in nei loten thlai chinte an tihchhiat ṭhin avangin lonei mite lungawi lohna a chhuak a, hei vang hian chief minister Yogi chuan bawng chenna tur in hi khawdai leh hmun remchangah sak a nih tur thu a sawi.
District administration lam tarlan danin, tunah hian bawng chenna tur hmun hi sak ṭan mek an ni tawh. Mahse heng hmunte enkawl dan hi a la fel tawk lo tih an sawi. Prayagra-a bawng enkawlna in pakhatah chuan darkar 48 chhungin bawng 30 an thi a, hei hi tui an pekna a electric short vang nia sawi a ni.
UP sorkar hian bawng enkawl hi a ngai thutak hle a, khawlai bawng enkawlte chu bawng pakhat enkawl manah cheng 30 zel pek an nih dawn thute pawh an lo sawi tawh bawk. Chief minister Yogi pawhin hemi chungchangah hian thuchhuah a lo siam tawh a ni.