BJP minister-te lakah PM a khauh
Prime minister Narendra Modi chu an party, Bharatiya Janata Party (BJP) minister, parliament inkhawma kal lote lakah a lawm lo hle. Thawhlehni khan thuneitute hnenah parliament inkhawma kal lo BJP minister-te hming a dil.
PM hian BJP minister-te chu Lok Sabha leh Rajya Sabha rorel inkhawm ngaipawimawh turin a duh hle a, an parliamentary constituency ṭheuhah active turin alo chah tawh bawk. BJP official-te chu parliament inkhawm a kal lote hming list siama a hnena thehlut nghal zel turin a chah a ni.
BJP hian Thawhlehni aṭang khan Parliament Library Building, New Delhi-ah party meeting an nei a, home minister Amit Shah, defence minister Rajnath Singh, parliamentary affairs minister Pralhad Joshi, minister of exernal affairs, S. Jaishankar, leh minister of state for external affairs, V Muraleedharan leh party senior leader eng emaw zat an tel.
Meeting a tel BJP hruaitute sawidanin PM chuan party parliamentarian-te chu politics-in a huam chin piahlam pawha thawk zel turin a chah tih an sawi. BJP leader hlun, Kailash Vijayvargiya fapa Akash Vijayvargiy-a'n sorkar official-te cricket bat hmanga a bei leh a hnua inchhirna thu engmah a sawi lo chu a dem hle a, hetiang ang mi hi chu tu fapa pawh nise party aṭanga hriatthiamna tel hauh loa hnawhchhuah zel tur, tiin PM hian a sawi bawk.
Thawhṭanni khan Lok Sabha chuan National Investigation Agency (Amendment) Bill, 2019-a pawm a, he amendment bill hian firfiakten India mi anbeihna tur venna kawngah National Investigation Agency (NIA) a pui nasa dawn hle. Union home minister, Amit Shah chuan Modi a sorkarin NIA dan hmang hian India rama firfiaka chetna a umbo dawn tih a sawi.