Home Minister-in Ram puma NRC kalpui a thlawp

Union home minister Amit Shah chuan centre-a BJP kaih­hruai sorkar chuan National Register of Citizens (NRC) chu ram puma kalpui a tum tih a sawi a, dan loa India rama rawn lutte chu thawnkir vek an ni ang, a ti. 

Nimina Rajya Sabha in­khawma minister of state for home affairs, Nityanand Rai-a'n Assam-a NRC kalpui mek chu July 31 thleng atan pawhsei a nih thu a sawi hnuah, Home Minister hian rawn sawi chhunzawmin NRC chu ram pum huapa kalpui an duh thu a sawi. 

Minister chuan, "NRC hi Assam Accord peng pakhat a nih avangin Assam-ah chauh kalpui a ni. Mahse sorkar laipui chuan election manifesto-a a lo sawi tawh angin, ramchhung kil tin aṭangin dan loa rawn lutte chu dapchhuah vek a tum. Heng mite hi international law zulzuiin thawn kir vek an ni dawn, " a ti.

BJP hian Lok Sabha election manifesto-ah khan NRC chu ramchhung hmun dangah a tahtawla kalpui a lo tiam tawh a ni. Home minister chuan NRC-a tel lo, Hindu refugee-te khua leh tui nihna pek an nih thehna tur bill pawh Parliament-ah putluh tum a nih thu a sawi.

Assam-ah hian NRC draft list hi ṭum hnih tihchhuah tawh a ni a, hetah hian NRC apply zinga mi nuai 40 chuang chu list-ah hian an tel lo a; tunah hian claims and objections hun an hawng mek a ni.