Chandrayaan-2 kahchhuah ṭhulh chhan hre tawh

Thawhṭanni-a thlaa kah­chhuah tura tih Chandrayaan-2 chu kahchhuah dawn ṭep darkar khat vel la awmah ṭhulh thut a ni a, a chhan puanzar nghal a nih loh avangin titi a ti tam hle.

Indian Space Research Organisation (ISRO) scientist hlui pakhat Chandrayaan-2 project-a la inhnamhnawih chuan kahchhuah a nih dawn khan a fuel a awm tawh lo tih a sawi. Propellent team aṭangin helium leak a awm a, mahse tunah chuan buaina awm chu an hrechhuak tawh a ni, a ti. Plumbing-a nipple joint valve chuan hna a lo thawk mumal tawh lo a, mahse hei hi harsa lutuk loa siamṭhat theih nia ngaih a ni. 

Buaina awm hi Thawh­lehni tukah khan an hmu­chhuak nghal a, valve siamṭhat a nih hnuah hian ISRO chuan a fuel hi an thun leh phawt dawn a, chumi hnuah leak a awm leh awm loh an endik leh ang. Heng an enchhinna zawng zawng hi a hlawhtling a nih chuan mission hi an kalpui leh thei dawn a ni.