Karnataka sorkar fiahnaah MLA helte tel tum lo

Karnataka-a rorellai, Congress-Janata Dal (Secular) MLA helte chuan vawiina Assembly-a sorkar fiahnaah tel an tum lo tih an sawi. 

Supreme Court chuan Congress leh JD(S) MLA hel 15-te chu vawiina chief minister HD Kumaraswamy kaihhruai sorkar fiahna turah, assembly inkhawma telh luih tir an ni tur a ni lo, tiin nimin khan a lo sawi tawh a ni. Chief justice Ranjan Gogoi kaihhruai bench chuan speaker-in MLA helte banna thehluh chungchanga thutlukna a siam chu amahin hun tiam a siam chhungin a tifel tur a ni, a ti bawk. 

Karnataka MLA 16, Congress mem­ber 13 leh JD(S) member pathumte chuan banna an thehlut a, anni bakah inde­pendent MLA pahnih chuan ṭangrual sorkar an thlawpna an hnukdawk bawk. Mahse speaker hian MLA-te banna thehluh hi a la pawmsak lo. Mahse MLA-te hian banna an thehluh hi hnuhkir an tum lo tih an sawi a ni. 

MLA helte tel lo hian Congress-JDS ṭangrual hian member 225 awmna House-ah member 101 an nei dawn a, BJP hian independent MLA pahnih thlawpna nen member 107 a nei thung ang.