Covid-19 : Sorkar laipuiin state/UT 10-ah high level team tir

Sorkar laipui chuan state/UT 10-ah Covid-19 hri kai an pun chhoh leh avangin high-level team a tir. 

Member pathum zel awm­na, multi-disciplinary team hi  Maharashtra, Kerala, Chhat­tisgarh, Madhya Pradesh, Gujarat, Punjab, Karnataka, Tamil Nadu, West Bengal leh  Jammu and Kashmir-ah tirh an ni. Team tin hi health ministry-a joint secretary-level officer-ten an ho ṭheuh a ni. 

High-level team-te hian state/UT thuneitute chu hri kai an pun chhoh leh dan enfiahna kawngah an pui dawn a, hri darh zel tur venna kawnga hma lak dan turah health department lam thuneitute an thawhpui bawk ang. Heng state/UT te hi district tin official-te nen hri leng dinhmun thlir a, review meeting mumal taka nei fo tura hrilh an ni bawk. 

Sorkar laipui chuan Maha­rashtra, Kerala, Chhattisgarh, Madhya Pradesh, Gujarat, Punjab leh Jammu and Kashmir sorkar hnenah lehkha thawnin, hri kai an pun zualna hmun leh, RT-PCR test neih tlem a nihna chhante sawifiah turin a ti. RT-PCR test chu tam zawk nei tura hrilhin, a bikin hri leng hluarna district-te chu ngai pawimawh zual turin a ti a ni. 

Rapid antigen test hmanga symptom nei si, negative result neite chu RT-PCR test neih sak leh vek turin sorkar chuan a ti a, positive case contact tracing pawh uluk taka neih a ṭul thu a sawi. Tun hnaiah Maharashtra leh Kerala bikah hri kai hi an pun chho chak leh hle a, ram puma Covid-19 hri kai mek zinga 75% chu heng state pahniha mite hi an ni.

State ṭhenkhatah hri kai an pun leh tak avangin state eng emaw zat chuan state dang aṭang lut tur, a bikin Maharashtra, Gujarat, Kerala, Madhya Pradesh leh Chhattisgarh aṭanga lut turte tan khuahkhirhna an siam ṭha leh. 

Nikum kum laihawl vel khan state tin deuhthaw chuan hri leng vangin hmun dang aṭanga an state-a lut turte tan khuahkhirhna hi an lo siam tawh a, mahse hri lengin ziaawm lam a pan chhoh tak avangin an thlahdul deuh vek tawh a ni. Mahse state ṭhenkhatah hri leng an pun leh tak avangin, state eng emaw zat chuan heng state aṭanga lut turte hi RT-PCR test neih an phut thar leh a ni. 

Maharashtra-ah chuan kar liam ta chhung khan minister pangain Covid-19 an kai tih hmuhchhuah a ni. 

Maharastra sorkara mi­nister 43 zinga 26 chuan Covid-19 hi an kai tawh a, an zingah hian deputy chief minister Ajit Pawarw, home minister Anil Deshmukh leh PWD minister Ashok Chavan-te pawh an tel.