PM Modi hming chawiin cricket stadium hming thlak

President Ram Nath Kovind chuan nimin khan khawela cricket arena lian ber, Ahmedabad-a Motera hmuna Sardar Patel Stadium chei ṭhat chu a hawng a, he stadium hming hi prime minister Narendra Modi hming chawiin thlak nghal a ni. 

Stadium siam hi Gujarat chief minister a nih laiin Narendra Modi hian a lo buaipui tawh a, hetih lai hian Gujarat Cricket Association (GCA) president a ni bawk a ni, tiin President chuan a sawi. Stadium hawnna hun hmanpuitu, union home minister Amit Shah chuan Modi-a dream project a nih avangin a hming chawitir a nih thu a sawi. 

President hian stadium-a sports com­plex, Sardar Patel Sports complex hawnna hun a hmang nghal bawk. He hmunah hian sports discipline hrang hrang - football, hockey, basket­ball, kabbadi, boxing, leh lawn tennis tan hmun siam a ni. 

Ram acre 63 chuanga zaua sak, stadium hi Rs vbc 800 senga siam niin, entu mipui 1.32,000 awm theihna a ni. Stadium design-tu hi Melbourne Cricket Stadium design-tu, Australian architect firm Populous a ni.