Karnataka Sorkarin trust vote la tura Governor thupek zawm duh lo

Karnataka-a Congress-Janata Dal (Secular) ṭangrual sorkar chuan Governor Vajubhai Vala'n sorkar fiahna, trust vote chu nimin chawhnu dar 1.30 ah nei fel hman turin ti mah se, zawm a nih loh vangin tlai dar 6 thleng hun a pe leh. Hei pawh hi sorkar chuan a zawm duh lo. 

Governor-in tlai dar 6 thleng hun a pek chu sorkar lam chuan a ngai pawimawh loin, dar 6  hnuah pawh trust vote la loin debate neih chhunzawm reng a ni. Governor chuan sorkarin debate neih a rawt chu floor test neih tur tihkhawtlai a tumna mai tih a sawi. Sum hmanga MLA inlei a awm nia inpuhna leh complaint tam tak a dawn thu a sawi a, hei vang hian hun tikhawtlai tawh loa sorkar fiahna chu kaltlangpui thuai a ngai tawh tih a sawi a ni. 

Rorellai MLA 18-ten banna an thehluh avang leh, independent MLA pahnihten sorkar thlawpna an hnuhdawh avangin Congress-JDS ṭangrual sorkar hian thlawptu a ngah tawk tawh lo nia sawi a ni. Mahse chief minister HD Kumaraswamy chuan an dinhmun a derthawn loh thu leh, fiah pawh an ngam thu a lo sawi tawh a ni. 

Ningani khan CM Kumaraswamy chuan Assembly  inkhawmah sorkar fiahna tur motion pu lûtin debate neih zui a rawt nghal bawk. Eptu party, BJP chuan Ningani ngei  khan trust vote neih fel nghal an phut a, Governor hnenah pawh an zualko a ni. Mahse vote la loin Ningani zan khan rorel inkhawm hi tihtawp a lo ni tawh. 

CM chuan Assembly-a sorkar fiahna neih turah MLA helte chu an duh thu a ni loh chuan awm luihtir an ni tur a ni lo tia Supreme Court thupek lo siam tawh chu sawifiah turin a phut. Hei bakah hian Governor Valla chu trust vote chungchangah thupek siamtu tur a ni lo tiin, House rorel dan turah Governor chuan thu a rawn nei tur a ni lo, a ti.