UP-ah police-ten Priyanka Gandhi an dang
Uttar Pradesh a Sonbhadra khuaah Nilaini khan ram inchuh vangin inkahna a thleng a, mi 10 an thi a, hliam tuar 24 an awm bawk.
Eastern UP a congress in-charge Priyanka Gandhi chuan mitthi chhungte hi tlawh tumin Zirtawpni khan amah zuitute nen Sonbhadra an pan a, kawng lakah police-ten lo dangin kaltlang an phal lo.
Priyanka hi Sonbhadra panna kawng Mirzapur-ah ṭhuin kaltlang an phal hun a nghak a, a security leh congress worker-ten an veng a ni. Priyanka chuan mitthi chhungte tlawh tur chauha kal a ni a, he inkahna avang hian damdawi-inah mipa naupang a fapa ang rual vel a awm thu sawiin; eng dan hmanga lo dang nge an nih a zawt nghal bawk.
UP DGP OP Singh chuan, Priyanka chu an hreng ni lo in, Sonbhadra-a a kal tur chiah an dan a ni a, Chunar guest house-ah an hruai tih a sawi. Priyanka chuan mitthi chhungte a hmuh hma chuan khawiah mah kal a tum loh thu a sawi thung. Rahul Gandhi chuan a farnu dan loa sorkarin a lo dang chu UP sorkar mumal loh vang a ni, a ti.
Sonbradha khaw hotu Yagya Dutt leh a hote chuan Nilaini khan loneitute ram acres 36 a zau laksak an tum a, mahse loneitute hian an thlahtute aṭanga an rochun ram hi pek an tum loh avangin Dutt-a hote hian silaiin an pawng kah ta a ni. Dutt hian loneitute ram chhuhsak tur hian mi 200 leh tractor 32 a hruai. He pawikhawihnaa inhnamhnawih mi 24 man an ni tawh a,Yagya Dutt leh a unaupa telin mi 78 chu thubuai siamsak an ni.
Priyanka chuan UP sorkar chu sual dona kawngah a muthlu tih sawiin, BJP sorkar hnuaiah pawikhawihna a huangtau hle tih a sawi. Chief minister Yogi Adityanath chuan Congress sorkarin heng misualte hi humin an vulh lian a, he chhiatna thleng hi a rah chhuah a ni, a ti ve thung.