AP hnena pawisa a puk tir tum World Bank-in ṭhulh leh

Andhra Pradesh-in an state khawpui thar Amaravati siamna tur atana World Bank-in USD maktaduai 300 (Rs. vbc. 2,065 appox) puktir tura ruahmanna a siam chu a ṭhulh leh. 

World Bank chuan an website-ah hemi chungchang hi tarlangin - 'Amaravati Sustainable Infrastructure and Insti­tutional Development Project' chu paih a nih thu a tarlang. A chhan erawh tarlan a ni lo thung.

AP-a sorkar thar YSR Congress sorkar chuan Amaravati khaw­­pui project hi a ngai­pawimawh lo hle  nia sawi a ni. Capital pro­ject kalpuitu agency, Andhra Pradesh Capital Region Development Authority (APCRDA), official chuan loan pek tur ṭhulh chungchangah hian World Bank nen inbiakna an la nei lo tih a sawi. Official hian a hma pawhin World Bank hian project  kalpui mek chu enfiah an duh tih a lo sawi tawh a, bank chu thla khat dang hun pe leh turin kan dil a ni, tiin a lo sawi tawh a ni.

Capital project hi sorkar hmasa N Chan­drababu Naidu kaihhruai Telugu Desam Party (TDP) hmalakna kha a ni a, World Bank hnena ruahmanna a thlen dan chuan USD mtd. 715 vel sen a ngai a ni. World Bank lam hian USD mtd. 300 thlenga puih a inhuam thu a lo hrilh tawh bawk.

World Bank lam pawh hian project hi an enpui tawh a, mawhphurtute pawh meeting an neihpui tawh bawk a ni.