Thla khat dawn hnuah hri kai thar 15,000 aia tam awm leh
Hun eng emaw chen India ramah hri lengin ziaawm lam a pan hnuah, tun hnaiah state ṭhenkhatah hri kai an pung chho leh ṭan. Nilaini khan ram pumah hri kai hmuh chhuah thar mi 16,738 an awm a, hei hi thla khat dawn chhunga ni khata hri kai hmuh chhuah tam ber ni a ni.
January 29 khan hri kai hmuh thar hi 18,855 awmin, hemi hnu hian ni khatah hri kai hmuh thar hi 15,000 hnuai lam zel a ni chho a, mahse Nilaini khan a rawn pel chho leh a ni. Hripui vanga thi pawh ni 26 hnuah Nilaini khan 130 chuang an tling leh bawk.
Nilainia hri kai hmuh thar zinga 89.57% hi state pasarih - Maharashtra, Kerala, Punjab, Madhya Pradesh, Tamil Nadu, Gujarat leh Chhattisgarh-a mi an ni tih union health ministry chuan a tarlang. Maharashtra-ah hri kai hmuh thar hi tam berin mi 9,807 an awm a, Kerala-ah 4,106 leh Punjab-ah 558 an awm a ni.
Maha-a Latur district-ah Janata curfew puang dawn
Hri leng hluarna state, Maharashtra-a Latur district-ah chuan hri kai an pun chhoh leh tak avangin February 27 leh 28 hian Janata curfew an puang leh dawn.
Latur collector Prithviraj BP chuan district mipuite chu virus chain tihtawp a nih theihna turin Janata curfew puan tur chu ṭha taka zawm turin a ngen a, emergency thilah a nih loh chuan hemi hun chhung hian an in chhuahsan lo turin a ti.
Privithraj chuan mipuite chu pawn chhuahnaah face mask vuah ṭha turin a ngen a, a vuah lo mante chu pawisa chawitir zel an nih tur thu a sawi. Hri darh tur venna kawnga thuneitute hmalakna chu ṭha taka thawhpui turin mipuite a sawm a ni.