India-Pakistan in LoC-a inkah tihtawp remti

India leh Pakistan sipaite chuan nimin khan Jammu and Kashmir-a ram pahnihte inrina, Line of Control (LoC)-a inkah chu titawp vek an remti. He hmunah hian tun hnaiah ram pahnih sipaite hi an inkap fo a, a chhehvela cheng mi eng emaw zatin nunna an lo chan phah tawh a ni. 

Kum 2003 khan India leh Pakistan hian LoC-a inkahhai puanna, inremna hi an lo ziak tawh a, mahse inremna siam hi vawi tam tak an bawhchhia a ni. Nimin khan ram pahnihte hian Director Generals of Military Operations (DGMO) inbiakna neiin, LoC leh sector dang chungchangte an sawidun a ni. Inbiakna an neih zawh hnuah thuchhuah inṭawm an siamah, LoC leh sector danga inkahna awm ṭhin chu titawp vek a, boruak ṭha leh muanawm a awm theihna atana hma lak an remtih thu an sawi.