Covid-19 Lockdown zawh hnuah mi sing chuangin hri an kai hman ring

India ramah coronavirus kai an pung chak hle a, Nilaini khan hri kai hriatchhuah thar hi mi 328 an awm hman. Kar khat chhungin hri kai hi a letin an pung hman a ni. 

Hri darh chak dan aṭanga chhutin, sorkarin laipuiin hri darh zel tur venna atana ni 21 chhung inkharkhip, lockdown a puan chungin April 15-a lockdown a tawp hunah ram chhungah hri kai hi mi sing chuang an tlin hman rin a ni. 

Hri kai hriatchhuah thar tam zawk hi Islamic group, Tablighi Jamaat-in Delhi-a Nizamuddin Markaz-a inkhawma telte an ni a, he hmun hi ram chhung hri ṭai darhna hmunpui pakhat ang hiala ngaih a ni tawh a ni.  He inkhawmna hmuna tel tam takte chu mahni state lamah an kal darh tawh avangin hri pawh hi an putdarh hle rin a ni a, state sorkar hrang hrangte chuan inkhawma telte dapchhuah hna hi ngawrh takin an thawk mek. 

Union home minister-in a tarlan danin, Nizamuddin mosque-a  awmkhawm an hruaichhuah zinga 1,000 chuang chu khung hran a ni a, an zinga 21 chuan hri an kai tih finfiah a ni tawh a, mi pahnihin an thihpui bawk.