Karnataka sorkarin fiahna a paltlang zo lo

Karnataka-a Congress-Janata Dal (Secular) ṭangrual sorkar fiahna, trust vote neih tur chu hun eng emaw chen tihkhawtlai a nih hnuah Thawhlehni zan khan neih a ni ta a, ṭangrual sorkar chuan fiahna paltlang zo loin paihthlak a ni ta. 

Assembly House-ah trust vote motion hi chief minister HD Kumaraswamy putluh a ni a, Thawhlehni zana vote lakah sorkar thlawp lamah MLA 99-in an vote laiin, a thlawp lo lamah vote 105 a tla thung. Vote laknaah hian MLA 20-ten vote an thlak ve lo. Vote thlak lo zingah rorellai party pahniha MLA hel 15 leh sorkar thlawpna hnukdawktu independent MLA pahnih an tel. 

HD Kumaraswamy kaihhruai Congress-JD(S) ṭangrual sorkar hi thla 14 ro a rel hnuah paihthlak a ni ta a, BJP kaihhruai sorkar a ding ve leh thung tawh dawn a ni. Trust vote neihah an chak zawh tak loh vangin Kumara-swamy chuan Thawhlehni zan la la khan Raj Bhavan-ah kalin, governor Vajubhai R Vala hnenah banna a theh luh nghal a ni. Vala chuan amah thlaktu tur tihfel a nih hma chu CM hna chelh chhunzawm rih turin a lo ngen nghal a ni.