EC-in state 4 leh UT 1-a assembly inthlan neih hun tur a puang

Election Commission of India chuan nimin tlai khan state pali - West Bengal, Assam, Tamil Nadu, Kerala leh Puducherry Union Territory-a assembly inthlan neih hun tur a puang. 

Chief Election Commi­ssioner (CEC) Sunil Arora chuan nimin tlai dar 4.30 khan press conference koin, state/UT panga-a inthlan neih hun tur hi a puang a, nimin aṭang vek khan heng state pali leh UT pakhatah hian Model Code of Conduct hman ṭan nghal a ni. 

Assam-ah inthlan hi thawh thuma neih a ni dawn a, March 27-ah a thawh khatna neih niin, April 1 leh April 6-ah vote thlak thawh hnihna leh thawh thumna neih a ni ang a, May 2-ah vote chhiar a ni ang. 

West Bengal-ah inthlan hi thawh riata neih a ni dawn a, March 27-ah a thawh khatna neih a ni ang. April 1, 6, 10, 17, 22, 26 leh 29-ah te vote thlak chhunzawm a ni dawn a ni. 

Kerala, Tamil Nadu leh Puducherry-ah chuan inthlana hi thawh khatah zawh nghal a ni dawn a, April 6-ah vote thlak a ni ang.  

Vote tlate hi May 2-ah an chhiar vek dawn a ni. 

West Bengal-ah hian assembly seat 294 a awm a, Tamil Nadu-ah seat 234, Kerala-ah 140, Assam-ah 126 leh Puducherry-ah seat 30 a awm. Inthlan neihna tur hi a vaiin seat 824 a ni a, voter vaibelchhe 18.68 an awm. Vote thlakna tur polling station hi nuai 2.7 siam a ni ang. 

Inthlan neihna tur state pali-te assembly term hi May leh June-a tawp turte an ni. Puducherry-ah chuan V Narayanasamy kaihhruai Congress sorkar chu thlawptu a ngah tawk tawh loh avangin paihthlak a ni a, President's Rule hnuaiah dah mek a ni thung. 

Ram chhunga hripui leng mek avangin inthlan neih tur pawh hi fimkhur tak leh, sorkarin hri leng laka invenna tur kaihhruaina a siamte khauh taka zawm tum a ni. 

Vote thlak theih hun pawh darkar khata pawhsei a ni ang. Campaign-na atan Road show neih phal a ni dawn a, door-to-campaign erawh mi panga chinin an neih phalsak a ni thung. Poll official-te chu vaccine pek vek an ni dawn a ni.  

Hripui a len hnuah nikum October-November chhung khan thawh thumin Bihar assembly inthlan chu neih a ni lo ni tawh a, hemi hnua assembly inthlan neih lehna hmasa ber tur an ni. 

Bihar assembly inthlan neihah khan vote nei vaibelchhe 7.3 awmin, vote 57.34% a tla a ni. 

West Bengal-ah hian Mamata Banerjee kaihhruai Trinamool Congress chuan ro a rel mek a, seat 294 awmah TMC hian MLA 211 neiin, Congress-in 44, CPI(M)-in 26, BJP-in pathum leh CPI-in pakhat a nei a ni. 

Assam-ah BJP kaihhruai ṭangrual sorkar ding mekin, BJP-in seat 60, Congress-in 26, AIUDF-in 14, AGP-in 14 leh BPF-in seat 12 an nei. 

Tamil Nadu-ah AIADMK-in sorkarna an siam mek a, seat 234 awmah AIADMK hian seat 134 neiin, DMK-in 89 leh Congress-in seat 8 a nei mek. 

Kerala-ah chief minister Pinarayi Vijayan kaihhruai Left Democratic Front an sorkar mek a, CPI(M)-in seat 58, Congress-in 22, CPI-in 19, IUML-in 19, Kerala Congress (ML) leh Independent-in seat 6 ve ve leh, BJP-in seat 1 an nei mek.