March 1 aṭangin kum 60 chinte vaccine pe dawn
Sorkar laipui chuan March 1 aṭangin Covid-19 vaccine pek thawh hnihna chu a ṭan dawn a, kum 60 chunglamte leh kum 45 tling chin, natna benvawn neite pek an ni dawn tih a sawi.
Covid vaccine hi sorkar healthcare facility 10,000 vel aṭangin a thlawnin pek chhuah a ni a, hetih lai a duh tan private facility aṭang pawha lak theih tura kalpui tum a ni.
Union information and broadcasting minister Prakash Javadekar chuan private sector hnuaia vaccine lakna man tur bithliah zat hi union health ministry chuan a puang thuai dawn tih sawiin, private hospital-te nen an sawiho mek tih a sawi.
India ram pumah January 16 aṭang khan Covid-19 vaccine pek chhuah ṭan a ni a, a thawh khatnaah hian healthcare leh frontline worker-te pek an ni. A thawh hnihna hi March 1 aṭangin kalpui ṭan a ni leh dawn a ni.
Nimin thleng khan ram pumah healthcare leh frontline worker vaibelchhe 1.34 te hnenah vaccine pek a ni tawh. Healthcare worker zingah mi nuai 66.21 in a dose khatna la tawhin, mi nuai 20.32 in a dose hnihna an la tawh.
Frontline worker zingah vaccine dose khatna hi mi nuai 48.18 hnenah pek a ni tawh bawk.
Vawiin leh naktuk (February 27 leh 28) hian vaccine pek hna hi chawlh a ni rih dawn tih union health ministry chuan a sawi a, hei hi vaccine pekte register-na, Co-Win 1.0 aṭangin Co-Win 2.0-ah IT System transition neih a nih dawn vang a ni.
Hri kai 15,000 chuang awm leh
Ningani khan India ramah Covid-19 kai hmuh chhuah thar mi 16,577 an awm leh a, thla khat dawn hnua ni khata hri kai hmuh thar 15,000 chuang a zawna ni hnih an awm lehna a ni.
Hri kai mek hi 1,55,986-ah an kai chho leh tawh a, hei hi hri kai hmuhchhuah tawh aṭanga 1.41% an ni. Hetih lai hian state/UT 21-ah chuan hri kai mek hi 1,000 aia tlem an awm tawh. Hri kai enkawl dam tawh hi 97.17% niin, hripui thihpui hi 1.42% an tling tawh bawk.