Pulwama attack : Pakistan PM-in finfiahna pek phut

Jammu and Kashmir-a Jaish-e-Mohammad (JeM) ten Central Reserve Police Force (CRPF) convoy an beih chungchangah Pakistan Prime Minister Imran Khan chuan Pakistan a inrawlh nia puhna chu phain, an inhnamhnawih a ni tih finfiahna pe turin a  phut. 

Pakistan PM chuan video message a tihchhuahah, CRPF sipai 40 zet an thih phahna, JeM firfiak pawikhawihna thlengah hian a phenah Pakistan a inhnamhnawih nia sawi chu thu dik lo a ni tih a sawi a, hetianga firfiaka chetna hi Pakistan chuan a thlawp ngai lo a ni, a ti. Pakistan a inhnamhnawih tih finfiahna a awm nih chuan sorkar chuan a ṭul angin action a la ang, a ti. 

Imran Khan chuan an ram leilung aṭanga pawikhawihna thleng chu an duh lo tih sawiin, India sorkar hnenah pawh Pakistan mite inhnamhnawih an awm a ni tih finfiahna a pek theih chuan an lakah action an la ngei dawn tih a hrilh nghal tih a sawi. 

Khan chuan India sorkarin Kashmir chungchanga a ngaihdan leh a hmalak dan chu a enfiah a ngai a ni tih sawiin, Kashmir ṭhalaiten tharum thawhna thlen an inpeih reng chhante pawh a zawhchian a ngai a ni, a ti. Sipai leh tharum chuan buaina a chingfel lo tih sawiin, hei vang hian Kashmir chungchang hi India chuan a ngaihtuah ṭhat leh a ngai a ni, a ti. 

India ramin inthlanpui a hmachhawn kum tur a ni a, hei vang hian sorkarin  hmingṭhatna lak tumin Pakistan chu thil ṭha lo thlengah a mawhpuh ṭhin chu a hrethiam tih Pakistan PM chuan a sawi.  Hemi rual hian Pakistan chuan a chhang let ve dawn lo nia ngai lo tura a duh thu leh, India in a bei a nih chuan an chhang let zel dawn tih a sawi. 

Pakistan hian Kashmir-a CRPF beih an nih avanga India nena an inkar boruak ṭha lo leh inepna awm chungchangah United Nations chu inrawlh turin a ngen bawk. Pakistan Foreign Minister Shah Mahmood Qureshi chuan UN Secretary General Antonio Guterres hnenah Thawhṭanni khan lehkha thawnin, ram pahnihte inkar boruak sang mek tidai tura inrawlh turin a ngen a ni. Qureshi chuan Pulwama-a sipaite beih an nih chungchangah India lam thuchhuah ngei pawhin pawikhawihtu hi Kashmir-a cheng a ni tih an tichiang tih a sawi a, hetihlai hian chhuichianna pawh a awm hmaa pawikhawihna thlenga Pakistan mawhphurtua puh chu thil awmze nei lo tak a ni, a ti. Qureshi chuan a lehkha hi Security Council leh General Assembly member-te hnenah thawn darh turin a ngen bawk.