Court thupek zah loah Anil Ambani puh Ericsson hnenah Rs vbch 450 pe turin hriattir

Supreme Court chuan industrialist Anil Ambani chu court thupek zah loah puhin, kar li chhungin Ericsson hnenah a sum bat cheng vaibelchhe 450 pe turin a hriattir. Hei hi a pek loh chuan thla thum chhung jail-ah a tang dawn tih a sawi bawk.

Court chuan Reliance Group chairman Ambani hi court lakah a inlak ngen avangin a sawisel bawk a, Supreme Court Registry hnenah cheng vaibelchhe khat pe turin a  ti bawk a ni.

Telecom hmanrua siamtu, Sweden company Ericsson chuan Anil Ambani hian a pawisa ba a pe duh lo tih sawiin, Supreme Court-ah hian a thlen a ni. 

Ericsson India chuan Reliance Group hian Rafale jet deal-ah pawisa invest tur tam tham tak a neih theih laiin, an company laka a leiba Rs vaibelchhe 550 chu a rul duh lo niin a sawi. He puhna hi Anil Ambani kaihhruai company chuan a pha thung. 

Anil Ambani chuan Supreme Court hnenah hian a u, Mukesh Ambani-a enkawl Reliance Jio nena assets sale deal an siam theih loh vangin a company chuan a leiba chu a la rul thei lo a, hei bakah hian fund pawh hi a thununna hnuaiah a awm rih lo niin a sawi. Reliance Communciation (RCom) chuan Ericsson sum an bat hi rulh ngei tumin theihtawp an chhuah a, mahse Reliance Jio nen inremna an la siam theih loh avangin an la tihlawhtling thei lo niin a sawi. 

Nikum October 23 khan Supreme Court chuan RCom hnenah hian Ericsson sum a bat chu December 15 hma ngeia rul tla turin a lo hriattir tawh a, a rulh loh chuan kum khata a pung 12% nen a rulh leh a ngai tawh ang tiin a lo hriattir tawh a ni.