Mann Ki Baat : PM-in zirlai exam turte fuih

Prime minister Narendra Modi chuan nimin khan thla tina radio programme a hman ṭhin, Mann Ki Baat hmang lehin, zirlai annual exam hmachhawn turte a fuih. 

A ṭum 74-na atana radio programme a hman­ah hian, PM Modi chuan exam hmachhawn tur zirlaite chu rilru hah leh hlauthawng taka awm lo tura fuihin, phur taka exam tura kal a, hlim taka haw leh turin a chah. Zirlaite chu mu ṭha tur te, hun vawn dan mumal tak nei a, infiamna pawh thlahthlam lo turin a ti. 

Nimina radio-a thu a sawiah PM hian water con­servation, coronavirus leng mek leh employment chungchangte pawh a sawilang. Hei bakah hian India-in mahni intodelhna policy a siam chawilar turin ram mipuite chu ramchhung ngeia thil siamte hman uar turin a chah bawk. 

Nipui a thleng dawn ṭan a, hei vang hian India mi tupawhin tui humhalhna kawng an mawhphurhnate an hriat thar a pawimawh thu sawiin, Modi chuan ruah tui khawlkhawm dan inzirtirna tur, Jal Shakti Ministry-in 'Catch the Rain' campaign a neih tur thu a puang. 

Hri leng mek chung­changah mipuite chu inthlahdah lo turin PM chuan a ngen a, hri darh tur leh hri laka invenna dan siamte chu khauh taka kenkawh zel a la ṭul tih a sawi.