A vawi khat nan India rocket hmangin Brazil satellite kapchhuak

Indian Space Research Organisation (ISRO) chuan nimin zing dar 10.24 khan India rocket PSLV-C51 hmangin a vawi khatna atan Brazil satellite Amazonia-1 leh satellite 18 chu Sriharikota-a Satish Dhawan Space Centre aṭangin a kapchhuak.

Kg 637 laia rit Amazo­nia-1 hi ni  (sun) a polar orbit-a dah a ni a, he satellite hi kahchhuah a nih hnuah satellite dang 18-te chu kahchhuah ni ve lehin, anni hi orbit-ah dah a ni. Satellite kahchhuah chungchangah hian ISRO chief K Sivan chuan Brazil team chu a lawmpui thu a sawi a, Brazil satellite India leh ISRO-in a kapchhuak thei hi inchhuanna tham a nih thu pawh a sawi bawk a ni.

PSLV (Polar Satellite Launch Vehicle)-C51 hi mission 53-na niin, Andhra Pradesh-a Nel­lore district chhunga Sriharikota spaceport aṭanga satellite 19 hi kahchhuah a ni. Prime minister Na­rendra Modi chuan sa­tellite kahchhuah a nih chungchangah hian Brazil president Jair Bolsonaro chu a lawmpui thu a sawi a, hei hian space lama ram pahnihte thawhdunna ṭha, hriatreng tur a nih thu a sawi.  Brazil scientist-te a lawmpui thu a sawi bawk.