Karnataka CM thar lalut

Karnataka chief minister thar atan BJP state president leh CM term thum lo chelh tawh, BS Yediyurappa chu nizan khan lakluh a ni. July 31-ah sorkar siam turin thlawptu a ngah tawk em tih fiah a ni ang. 

CM thar hian a hming Yeddyurappa chu Yediyurappa tiin a thlak let. A hming hi kum 2007 inthlan dawn khan vanneihna atan tiin Yeddyurappa tiin a lo thlak tawh a, mahse nimin khan CM atana lakluh a nih hma hian official-in a  hming pangngaiah a thlak let leh. 

HD Kumaraswamy kaihhruai Karnataka-a Congress-Janata Dal (Secular) ṭangrual sorkar chu Thawhlehni khan paihthlak a ni. Hemi hnu hian state BJP hruaitute chuan New Delhi-a an party hotute hmuin, sorkar siam dan turte an sawipui. 

Nimin zing khan Yeddyurappa chuan governor Vajubhai Vala hmuin, sorkar an siam theih thu hi a hrilh. Hemi hnu hian Raj Bhawan chuan CM thar atan Yeddyurappa lakluh a nih tur thu hi a puang a ni. CM thar lakluh inkhawm hi Kum 76 mi, Yediyurappa hian CM term li a chelhna tur a ni a, Karnataka chief minister 25-na a ni. CM term li chelh tawh mah se a term hi a la hmang tluan ngai lo. CM dinhmun a chelh rei lo ber chu nikum May thla kha a ni a, darkar 48 chhung chiah a chelh hman a ni. CM atana lakluh a nih hnu lawkah, trust vote neih turah thlawptu a ngah tawk dawn lo tih a hriat avangin a bang lehnghal.