North India state-te'n ruihhlo dona turin thawhhona thar an siam

North India state - Haryana, Rajasthan, Himachal Pradesh, Punjab leh Uttarakhand Chief Minister-te chu Ningani khan joint meeting neiin, ruih­hlo dona kawngah thawh­hona tur an siam.

CM joint meeting hian Joint Working Group din nise an ti a, he group hian heng state hrang hrang inkara ruihhlo tawlhruk, zawrh leh dan kalha thil tite dona kawngah hma an la ang. Meeting-ah hian heng state pangaa Health and Social justice department hruaitu ṭheuhte an tel a, ruihhlo dona kawnga an hmalak dan leh an kalphungte an inhrilh tawn a ni.

Chandigarh-a 'Second Regional Conference on Drug Menace' neih zawhah an thawhhona thu hi an puang a ni. Pakistan, Afghanistan, Nigeria leh ramdang aṭ-anga ruihhlo lutte dona tura thawhho leh an state ṭheuhte ruihhlo awm lohna 'free of narcotics' a siam tura thawhho an tum.

Delhi, Jammu and Kashmir leh Chandigarh CM-te inhmukhawm pawhin ruihhlo do chungchanga thawhhona ṭha zawk neih an rel bawk a, information inhrilh tawn zung zung theihna tur leh state leh state inkara ruihhlo tawlhruk ven dan tur chungchangte an sawiho. 

State pathumte hian sorkar laipui chu Na­tional Drugs Policy chak zawka kalpui turin an ngen. Chandigarh-ah Narcotic Drugs and Psychotropic Substances (NDPS) Act hnuaia thubuai chhuitu, investi­gator-te tan regional training centre din leh regional drug dependence treatment centre, sorkar laipui nen ṭangkawpa din tura ngenna thlen an rel bawk.