Vaccine pek chhuah thawh hnihna kalpui ṭan Prime Minister Modi-a'n AIIMS, Delhi-ah vaccine la

Ram puma Covid-19 vaccine pek thawh hnihna chu nimin aṭang khan kalpui leh ṭan a ni a, prime minister Narendra Modi chuan AIIMS, Delhi-ah vaccine hi a la a ni.

Ram dang hruaitu eng emaw zatin an ram mipuiten coronavirus vaccine lak an hlauh loh a, an rinngam theihna turin vaccine hi an lo la hmasa tawh a ni. US president Joe Biden, Israel president Benjamin Netanyahu, Indonesia president Joko Widodo te pawhin Covid vaccine hi mipuite hmuh lai ngeiin an lo la tawh a ni. India siam Covid vaccine hi Pope Francis, Saudi King Salman, Crown Prince Mohammed bin Salman, Queen Elizabeth leh Prince Philip of United Kingdom. Mongolian PM and Maldives President-te pawhin an lo la tawh bawk. 

Prime minister Modi hian biotechnology firm Bharat Biotech leh  Indian Council of Medical Research siam Covaxin a la a, vaccine a laknaah hian Assam 'gamcha' a awrh a ni. Vaccine a lak hnuah hian PM chuan a twitter-ah Covid-19 hripui leng mek dona kawnga doctor leh scientist-ten chak taka hna an thawk chu a fak nghal bawk. 

Vaccine pek chhuah thawh khatna hi January 16 khan ram pumah kalpui ṭan a ni a, India rama siam, Covishield leh Covaxin te hman a ni. A thawh khatnaah hian healthcare leh frontline worker-te pek niin, February 13 aṭang khan a thawh khatna atana a dose hnihna hi pek ṭan a ni bawk. Thawh khatnaah hian healthcare leh frontline worker vaibelchhe 1.43 chuang hnenah vaccine hi pek a ni tawh. 

Vaccine pek thawh hnihna hi kum 60 chung lamte bakah, kum 45 china natna benvawn neite tan tih a ni. Sorkar chuan kumin August thlaah  vaccine hi mi vaibelchhe 30 hnenah pek hman a tum a ni. Covid-19 vaccine thawh hnihna la turte hi CoWin portal, www.cowin.gov.in-ah in register a ngai a, registration hi zing dar 9 aṭangin an hawng ṭhin. Union health ministry chuan Playstore-a Co-WIN app chu administrator-te chauh hman tur a ni tih nimin khan a sawi. 

Kum 60 chung lam, vaccine lak duh in register turte tan government ID proof a tawk a, hetih lai hian kum 45 chin tante erawh an natna neih tarlanna, medical certificate an upload tel a ngai thung. Portal-a in register-naah hian vaccine an lak duhna centre an thlang thei bawk ang. 

Vaccine hi sorkar facility-ah a thlawna lak theih a ni a, private facility-ah man chawiin a lak theih bawk. Sorkar chuan private hospital-ah Covid vaccine hi dose khat Rs 250 zel turin a man a bithliah a ni. Sorkar chuan Ayushman Bharat PMJAY hnuaiah coronavirus vaccine lak theihna tur private hospital hi 1,000 vel a thlang chhuak a ni. 

India hi khawvela Covid-19 hri kai tamna ber ram dawttu niin, India aia hri kai tamna chu US ram chiah a ni. Hri thihpui tamna ram pathumna a ni mek bawk.