Maha Congress hruaituten fuel man to duh lohna lantir Session nei turin bicycle-in Assembly House an pan
Maharashtra Congress hruaitute chuan nimin khan ram chhung fuel man sang zel duh lohna lantirin session nei turin thirsakawr hmangin Assembly House an pan. Hemi hma hian fuel man sang duh lohna hi Bihar-ah Tejashwi Yadav, New Delhi-ah Robert Vadra leh Madhya Pradesh eptu MLA-te pawhin an lo lantir tawh bawk.
Nimin khan Maharashtra budget session ṭan ni a ni. Congress hi Shiv Sena kaihhruai Maharashtra Vikas Aghadi ṭangrual sorkarah a tel mek a ni. Central-a BJP kaihhruai NDA sorkarna hnuaia fuel man sang zel duh lohna lantira bicycle rally neihnaah hian minister - Balasaheb Thorat, Aslam Shaikh, Yashomati Thakur bakah Mumbai Congress chief Bhai Jagtap-te pawh an tel.
State Congress president Nana Patole chuan sorkar laipui chu mipuite nuihzatburah puhin, an ka ami ei tur pawh chhuhsak duhah a puh a ni. Tun hnaiah ram chhungah fuel man hi a to chak hle a, Mumbai-ah chuan petrol litre khat Rs 97 leh diesel litre khat Rs 88.64 a ni. Fuel man sang zel avangin sorkar laipui pawhin sawisel a tawk nasa a, eptu party hrang hrang hruaitute leh chief minister-ten lungawi lohna pawh an lo lantir fo tawh.
Tun hnaiah West Bengal chief minister Mamata Banerjee chuan fuel man sang duh lohna thuziak kengin, electric scooter hmangin a secretariat a pan a, Bihar-a Rashtriya Janata Dal (RJD) hruaitu Tejashwi Yadav pawhin bicycle-in Assembly House a kal tawh bawk. Congress hruaitu Sonia Gandhi makpa, Robert Vadra chuan February thla khan Delhi khawpuiah petrol leh diesel man sang zel duh lohna lantirin bicycle a lo hmang tawh bawk a ni.