Bengal Poll : Thawh riata inthlan buatsaih tumna khing

Election Commission of India-in West Bengal-a assembly inthlan thawh riata buatsaih a tumna chu nimin khan Supreme Court-ah khin let a ni. 

Lawyer ML Sharma chuan court-ah petition hi thehlutin, EC-in thawh riata state assembly inthlan buatsaih a tum hi Constitution-a Article 14  leh Article 21 palzutna a ni tih a sawi. 

February 26 khan Election Commission chuan state pali - West Bengal, Assam, Kerala, Tamil Nadu leh Puducherry Union Territory-a assembly inthlan neih hun tur hi a puang a ni. 

Tamil Nadu, Kerala leh Puducherry-ahte chuan inthlan hi ni khatah zawhfel a ni dawn a, Assam-ah thawh thuma neih tur niin, West Bengal-ah chuan March 27-April 29 inkarah thawh riata neih turin Election Commission chuan a ti thung.

Inthlan hun tur puan a nih hnu lawkah, West Bengal chief minister leh Trinamool Congress hruaitu Mamata Banerjee chuan inthlan hun chhung rei tak ruat a ni chu BJP ṭhatna tura duan a ni tih a sawi a, Left party-te pawhin inthlan thawh riat zeta buatsaih a nih tur chhan hi Election Commission chuan ṭha taka sawifiahna a hre lo tih an sawi bawk. Hetih lai hian BJP lam chuan EC thutlukna siam dan hi lawmawm an tih thu an lo sawi tawh thung a ni.