Pulwama attack : Hurriyat hruaitu 18 leh politician 155 security pek titawp
Jammu and Kashmir-a Pulwama district-a Jaish-e-Mohammad (JeM) firfiakin Central Reserve Police Forces (CRPF) convoy a beih vanga sipai 40 in nunna an chan hnuah, state sorkar chuan inlakhhran duhtu pawl, Hurriyat hruaitu 18-te venhimna a pek chu a titawp ve leh.
State chief secretary BVR Subrahmanyam hoa security review meeting neihah he thutlukna hi siam a ni a, inlakhran duhtu pawl hruaitute hnena security pek chu ṭul loa sum senna mai a ni tih sawiin, hemi atana a sensote chu thil dangah ṭangkai taka hman theih a ni zawk a ni, an ti.
Hemi hma hian state sorkar chuan inlakhran duhtu pawl hruaitu panga-te security a pek chu a lo titawp tawh a, Nilaini khan Hurriyat hruaitu 18-te security pek chu a titawp ve leh a ni. Anni bakah hian politician leh activist 155-te security pawh a tihtawp sak bawk. Heng mite security titawp a nih avang hian police 1000 leh motor 100 chuang chu police hna pangngai thawk turin chhawr theih an ni dawn ta a ni.
February 14-a Pulwamna district-a firfiak pawl thihchilh bomb tihpuah vanga sipai 40 in nunna an chan hnuah, February 17 zan khan Pulwama district-ah vek hian JeM firfiakte nena inbeihnaa sipai pali an thih belh leh a ni. J&K-a Naushera district-a India leh Pakistan inri-na, Line of Control (LoC) a firfiakte bomb kam sut a tumnaah sipai major pakhat a thi bawk.
Pulwama-a sipai convoy beih a nih hnuah Ministry of Home Affairs (MHA) chuan CRPF telna, Central Armed Paramilitary Forces (CAPF) sipaite thiarna atan Delhi-Srinagar, Srinagar-Delhi, Jammu-Srinagar leh Srinagar-Jammu inkarah thlawhtheihna hman a remtihsak. A hma chuan heng sector-ah hian officer chin chauh thlawhtheihna hmanga hruai an ni ṭhin. MHA thutlukna siam thar hi CAPF sipai 780,000 velin an chhawr thei dawn a ni.
Sipaite beih an nih hnua Jammu and Kashmir-a mipuiten lungawi lohna an lantirnaa tharum thawhna thleng vanga curfew puan chu nimin aṭang khan chhun lamah hlih a ni ta. Nimin aṭang khan Jammu-ah chuan bazar-te hawn leh niin motor-te pawh an tlanchhuak leh thei tawh a, school-te pawh kar khat zet khar a nih hnuah hawn an ni bawk. College leh university-te erawh khar chhunzawm an la ni thung.
Hetihlai hian nimin zing khan Pakistan sipaite chuan Poonch sector-a LoC-a inkahhai puan chu bawhchhiain silai an hmetpuak leh. Hei hi ni hnih chhunga inkahhai thutlung an palzut ṭum hnihna a ni.
Pakistan sipaite hian zing dar 1 aṭanga dar thum thlengin silai an hmetpuak a, ramri bula civil mite chenna lamah hmehpuakin mipui pawh an chiai phah hle.