Maha loneituten kawng zawh huaihawt leh

Maharashtra state-a loneitu 50,000 vel chuan state sorkar laka lungawi lohna lantirin Nilaini aṭang khan Nashik aṭanga Mumbai panin kawng an zawh leh. Kawngzawh hi Kisan Long March-2 tia vuah a ni.  Hei hi thla 12 chhunga lungawi lohna an lantir ṭum hnihna a ni. 

Nashik leh Mumbai inkara hi km 180-a thui a ni a, kawngzawhnaa tel tur hian state chhung district 23 aṭangin loneitute an kalkhawm a ni. Ni kaw chhungin Mumbai hi an thlen hman beisei a ni. 

Loneitute kawngzawh hi CPI(M) hnuaia All India Kisan Sabha (AIKS) huaihawt a ni a, February 27 hian Mumbai-ah a tawpna hun hman a ni ang. He ni hi freedom fighter Chandrasekhar Azad-a thih cham vawi 88-na a ni. 

AIKS chuan Maharashtra Chief Minister Devendra Fadnavis-a kaihhruai BJP sorkar chuan nikum March thlaa nawrh an huaihawt ṭuma an lak thu a lo tiam tawhte tihlawhtling loah a puh. Loneitute hian land rights, minimum support price, crop insurance scheme-te bakah khawkheng vanga harsatna an tawh ṭhina chhamdawlna pekte an phut a ni. 

Hetihlai hian state sorkar chuan Lok Sabha inthlanpui a hnaih tawh vangin loneitute thil phut ang zawng zawng chu a pe thei lo tih a sawi. Sorkar chuan a theih ang angin an thil phut chu a tihhlawhtlin sak tawh a, loneitute loan ba ngaihdam a lo tiam pawh a taka kalpui a nih thu cabinet minister Girish Mahajan chuan a sawi. Mahse activist-te chuan state sorkarin farm loan ngaihdam a tiam, cheng vaibelchhe 34,000 zingah cheng vaibelchhe 17,000 chauh ngaihdam a la nih thu an sawi thung.