Union Minister hlui Jaipal Reddy thi

Congress senior leader leh union minister hlui Jaipal Reddy chu nimin khan Hyderabad damdawi-inah pneumonia vangin kum 77-mi niin a thi a, vawiinah vui a ni ang. 

Reddy hi kum 1984 aṭang khan parliament ah ṭhu ṭanin; Lok Sabha MP atan vawi nga thlan tlin a ni tawh a, Rajya Sabha MP atan vawi hnih leh MLA atan vawi li thlan tlin a ni tawh bawk. 

President Ram Nath Kovind chuan twitter-ah Jaipal Reddy a ui thu sawiin; rorel thiam leh politician rilru nei tak a ni tih a sawi. A chhungte leh a thawhpuite chu a tawrhpui thu a sawi bawk. Prime Minister Narendra Modi pawhin Reddy chu ṭawngkam thiam leh awmze nei taka rorel ṭhin mi a ni tiin a thlahna thu a sawi. 

Reddy hi prime minister hlui IK Gujral hnuaiah khan Information and Broadcasting minister a ni a, UPA-1 sorkarah khan urban development and culture minister a ni leh a, UPA-2 sorkarah khan Urban development ministry-ah dah a ni a, a hnuah minister of Petroleum and natural gas-ah dah a ni a, Science and technology and earth sciences ministry-ah sawn a ni leh bawk.