PM Modi-a'n Tiger Census report tlangzarh India ramah sakei 2,967 an awm
Prime minister Narendra Modi chuan nimin khan ramchhung sakei chhiarpui neihna report, 'Status of Tigers in India-2018' a tlangzarh. He report hi National Tiger Conservation Authority (NTCA) and Wildlife Institute of India, Dehradun-ten an buatsaih a ni.
Report-a a landanin India rama sakei awm zat hi chhiarpui hmasa, kum 2014-a 2,226 aṭangin 2,967-ah an pung a, a punna hi 33% a tling. Sakei chhiarpui hi NTCA leh Wildlife Institute of India (WII) chuan state forest department leh Conservation NGO-te thawhpuiin, kum 2006 aṭang khan kum li danah an nei ṭhin.
Status of Tigers-in India-2018 report buatsaih tur hian kum li chhungin sakei chenna, state 20-a ramhnuai km 3,82,400 biala zauah zirchianna neih a ni. Hmun 26,838-ah camera dahin, sakei thlalak 76,651 leh keite thlalak 51,777 an la. Kum li chhunga zirchianna neihah hian mi nuai 70 vel zet an inhnamhnawih a, khawvel huap pawha population study lian ber a ni.
Zirchianna aṭanga a landanin, bial pangaah kum 2014 aiin sakei awm zat hi an pung. Chungte chu Shivalik-Gangetic - 485 aṭangin 646; Central India and Eastern Ghats - 688 aṭangin 1,033; Western Ghats - 776 aṭangin 981; North Eastern Hills and Brahmaputra Flood Plains - 201 aṭangin 219; leh Sundarbans - 76 aṭangin 88-te a ni.
Kum li zirchianna neih chhung hian tiger reserve pathum - West Bengal-a Buxa, Jharkhand-a Palamu leh Mizoram-a Dampa-ahte sakei hmuh an ni lo thung. Assam-a Nameri leh Arunachal Praesh-a Pakke-ahte sakei awm zat an tlahniam bawk.