Karnataka CM tharin trust vote paltlang Assembly speaker Ramesh Kumar bang nghal

Karnataka chief minister thar BS Yediyurappa chuan nimin khan trust vote paltlangin a kaihhruai  Bharatiya Janata Party (BJP) sorkar chu thla ruk chhung chu an him ta phawt a ni.

Member 225 awmna Karnataka Assembly-ah hian MLA hel 17-te chu disqualify an nih avang­in nimina trust vote lakah hian member 208-in vote an thlak a, BS Yediyurappa hian majority margin 105 a hmu a, an him chiah chiah.

Thla ruk chhung chu sorkar thar lakah hian no-confidence motion putluh theih a nih dawn loh avangin BJP hian hemi hunchhung hi chuan hlauthawng loin ro an rel thei tawh ang.

Karnataka Assembly speaker KR Ramesh Kumar chuan nimin khan a ban thu a puang ve nghal.

BS Yediyurappa-a'n trust vote a paltlang hnu lawkah KR Ramesh Kumar hian speaker a nihna aṭanga a ban thu hi a puang ve nghal a, "Tihsual ka neih a nih chuan min ngaidam dawn nia," tia sawiin a ban thu hi a puang a ni.

Deputy speaker Krishna Reddy hnenah a banna lehkha hi thehlutin assembly speaker a nihna chu a nuna a hlawhtlinna lian ber a nih thu a sawi. 

Ramesh Kumar hi BJP lam chuan an sawisel nasa hle a, sorkar paihthlak tak Congress-JS(S) in politics buaina a tawhah ṭangrual sorkar hi ṭan leh, hum tumah an puh a ni.  Mahse Ramesh chuan a chhia leh ṭha hriatnain dik a tih ang leh Constitution behchhanin thutlukna a siam mai thu a sawi ve thung.