UN High Commissioner for Human Rights-in CAA chungchanga inrawlh dilna SC-ah thlen
United Nations High Commissioner for Human Rights Office chuan Supreme Court hnenah Citizenship (Amendment) Act, 2019 (CAA) chungchanga inrawlh dilna, Intervention Application chu nimin khan a thehlut.
Ram chhung buaina bik a ni: India
UN body-in application an thehluh chungchangah hian Ministry of External Affairs chuan thuchhuah a siam nghal a, Citizenship Amendment Act hi India ramchhung buaina bik a ni a, India Parliament-in dan siam turin thuneihna a nei a ni. India thuneihna a nih angin rampawn lam aṭanga inrawlh an awm a ṭul kan ti lo a ni, tiin a tarlang nghal.
"CAA hi ram danpui hnuaiah a hman theih tih kan chiang", a ti bawk. MEA thupuangtu Raveesh Kumar chuan," India ram hi democray ram a ni a, dan hnuaia awm a ni. Mahnia ro inrelna kan neih hi kan zahin kan ring ngam. Supreme Court zahawm tak pawhin kan hmalaknaah hian thiam min chantir ngei ang," tiin a sawi. Raveesh Kumar chuan Thawhṭanni tlaiah khan UN High Commissioner for Human Rights, Michelle Bachelet chuan intervention application chungchang hi a hriattir niin a sawi bawk.
Ram pawn lam thlirna aṭangin
Nikum December-a CAA pawm a nih hnu lawk aṭang khan United Nations human rights office chuan a nihphung hrim hrimah inthliarna a nih thu a tarlang nghal a, ennawn leh turin a ti hial. Sorkar laipui chuan hnam tlem zawkte humhimna tur a ni ti mah se UN body chuan "Muslim-te humhimna tur a huam ve lo," a ti.
US Commission on International Religious Freedom (USCIRF) pawhin Donald Trump kaihhruai sorkar chu India dan siam chungchangah hian hma la turin a ti a, India thuneitute chu hrek turin Trump a ngen hial.
Kar hmasa khan Michelle Bachelet chuan Delhi hmarchhaka CAA vanga buaina chhuak chu a ngaihmawh thu sawiin, India thuneitute chu tharum thawhna pumpelh turin a ngen tawh bawk.
Sorkar a ṭang nâ
Prime minister Narendra Modi chuan thla hmasa khan Varanasi-a thu a sawinaah kum eng emaw zat chhung chu India chuan Article 370 tihbo leh CAA hman chu a tum tawh tih sawiin, ram tana ṭha tur a nih avangin Article 370 leh CAA chungchangah thutlukna pawh an siam tih a sawi. "Nawrna nasa hle mah se, kan thutluknaah hian kan ding nghet a, kan ding reng bawk ang," a ti.