Covid-19 : PM-in mipuite chiai lo turin chah
Prime minister Narendra Modi chuan coronavirus, Covid-19 leng mek chungchangah mipuite chu chiai lo turin nimin kha a chah. Hemi rual hian hri leng darh tur veng tura ṭha taka thawkho turin a ngen bawk.
PM chuan a twitter-ah hri leng laka inven dan chungchangte pawh ministry leh state sorkar hrang hrangte nen an sawiho tih a tarlang. Ram dang aṭanga India rama rawn lutte endik an nih dante sawiho a nih thu a tarlang bawk.
Thawhṭanni khan Delhi leh Telangana-ah Covid-19 kai pahnih hmuh an ni a, an pahnih hian enkawl tura dah hran nghal an ni.
Noida zirlai 40-te enfiah
Nodia-a Shriram Millenium School-ah Thawhṭanni khan zirlai pakhat nu leh pate chu Covid-19 an vei tih hriat a nih avangin school thuneitute chuan annual exam an neih tur pawh sawnin school pawh ni hnih chhung atan khar zui a ni. Zirlai 40-te chu he hri hi an kai leh kai loh test sak an ni a, ni 28 chhung dah hran tura tih an ni. Health ministry lam pawhin school hi an tlawh nghal bawk.