Rajya Sabha-ah Triple Talaq bill pharh JD(U)-ten house chhuahsan

Union minister of  law and justice Ravi Shankar Prasad chuan nimin khan Rajya Sabha-ah Triple Talaq bill a pharh.

Triple Talaq bill  hi Lok Sabha term hmasaah khan pawm ni tawhin, Rajya Sabha-ah a tlawlh thung a, kuminah pawh Lok Sabha chuan voice vote hmangin a pawm leh tawh  bawk. Nimin khan Rajya Sabha-ah bill hi pharh a nih hnuah debate an nei zui nghal.

Congress, Trinamool Cong­ress leh DMK-te chuan parlia­mentary committee-ah enfiah leh tura an duh thu an sawi a, eptu party tam zawk chuan he bill hi an dodal a ni. Ravi Shankar Prasad chuan he bill hi intluktlanna duh vanga pharh an nih thu sawiin, gender justice, dignity leh equa­lity kaihhnawih a ni, a ti.

Bill chungchanga debate neihnaah hian NDA-a BJP thawhpui  Janata Dal (United) chuan House an chhuahsan a, hei hian bill pawm a ti awlsam sawt dawn nia ngaih a ni thung.  JD (U) member Bashishtha Narain Singh chuan an party chu Mahatma Gandhi, Ram Manohar Lohia leh Jayaprakash Narayan-te ideology pawmtu an nih thu sawiin, bill hi an dodal tih a sawi a ni.

Triple Talaq hi awlsam taka Muslim mipaten an nupuite an ṭhen theihna dan a ni a, Muslim mipate chuan 'Talaq' tih hi vawi thum a zawna an nupuite hnena an sawi chuan an nupuite hi an ṭhen thei a ni.