Doctor-ten NMC Bill duh lohna lantir dawn

Lok Sabha-a Thawhṭannia pawm, National Medical Commission (NMC) Bill duh lohna lantirin vawiin hian doctor-te chuan ram pumah darkar 24 awh nawrh an huaihawt dawn. Doctor-te nawrh dawn vang hian sorkar hospital-a OPD-te chu khar vek an ni ang. 

Indian Medical Associa­tion (IMA) chuan he bill hi sût leh tura phutin nawrh hi a huaihawt a, state tinah pungkhawmin chaw ngheia nawrhte huaihawt a ni ang. Federation of Resident Doctors Association (FORDA) leh Resident Doctors Association (RDA), AIIMS chuan an member-te chu badge dum bel vek turin an ngen. 

RDA chuan NMC bill hi siamṭhat a nih loh chuan medical standard a tichhe dawn a, hei hian healthcare service thlengin a tichhe thei dawn tih a sawi. Doctor-te nawrh huaihawt vang hian non-essential service, OPD telin tukin zing dar 6 aṭanga naktuk zing dar 6 thlengin khar vek an ni dawn. Emergency, casualty leh ICU bakah a kaihhnawih service-te erawh chu dan pangngaia kalpui an ni thung ang.

IMA secretary general R.V.Asokan chuan,"NMC Bill section 32 hian medical lama qualify lo mi nuai 3.5 hnenah modern medicine khawih tura phalna a pe a ni. Hei hian paramedics zawng zawng, pharmacist, nurse, physiotherapist, potometrist leh midangte modern me­dicine an khawih ve leh anmahni duh ngei damdawi an chawh a phalsak a ni. He dan hian doctor suakte a pawm a ni," a ti.