ISRO-in kuminah mission nei hnem

Department of Space chuan Thawhṭanni khan annual report tichhuakin, Indian Space Research Organisation (ISRO)-in kum 2019 chhungin mission 38 a neih thu a tarlang. 

July 22-a kahchhuah, Chandrayaan-2 chu September 7 hian Thlaah a thlen hman beisei a ni. April thla khan ISRO hian, PSLV Chandrayaan 2 zing ami, intelligence gathering leh earth observation satellite pakhat ve ve a kapchhuah tawh bawk.

Mission a lo kalpui tawhte bakah kumin chhungin ISRO hian mission 32 kalpui tur a la nei.  Heng zingah hian satellite tê pathum kg 500 aia rit lo kahchhuah te, earth observation satellite pakua, communication satellite pathum, India workhorse tlangzarh vehicle PSLV pakua leh GSLV Mark II satellite rit chi pahnih kahchhuahte an tel.  Nikum khan ISRO hian satellite 17 a kapchhuak a ni. 

ISRO-in nakkuma an kahchhuah hmasak ber tur chu India solar mission hmasa ber tur Aditya L1 a ni. He satellite hi Ni leh Thla inkara L1 point-ah a awm ang a, Ni pawn lam a zir chiang ang. India human spaceflight programme hnuaiah, ISRO hian nakkum December-ah low earth orbit hmunah unmanned flight kahchhuah a tum bawk. Hemi hnu hian unmanned flight tho July 2021-ah kahchhuah a tum leh.

India space agency leh Russian Roscosmos chuan, space-a mihring an thawn theih nana thawhdunna tur Memorandum of understanding (MoU) an ziak. Kum 1961 April 12 khan Russia chuan Space-ah mihring a zintir hmasa ber a, Yuri Gagarin hi zin hmasa ber a ni.