India ramah Mukesh Ambani a la hausa ber

Hripui len kum, kum 2020 chhung khan India ramah mi hausa tawntaw, billionaire thar 40 an awm belh. India ramah hian billionaire hi 177 an awm tawh niin Thawhlehnia report tihchhuahah chuan tarlan a ni tih national media hrang hrangin an tarlang.

Mukesh Ambani chu India rama mi hausa ber a la ni chhunzawm zel a, a hausakna chu USD tluklehdingdawn 83 hu a ni. Reliance Industry head hausakna hi 24%-in a pung niin Hurun Global Rich List chuan a tarlang a, tunah hian khawvela mi hausa pariatna a ni mek.

India rama mi hausa ber dawttu chu Gujarat mi Gautam Adani a ni a, USD tld 32 vel a nei nia chhut niin khawvela mi hausa list-ah chuan 48-na a ni. IT company HCL's Shiv Nadar chu pathumna a ni a, USD tld 27 vel a nei niin an chhut thung.

Hurun India Managing Director leh Chief Researcher Anas Rahman Junaid chuan India mi hausate hausakna chu cyclical emaw traditional industry vang a ni tlangpui tih sawiin US leh China-ah erawh chu 'tech-driven wealth' an nih thu a sawi.

"Tech-driven wealth hmanga hausakna hian a theihna tawp a thlen hunah chuan India ram chuan US aiin billionaire an tam zawk thei a ni," a ti.