Farm law chungchanga SC committe dinin March 20-ah final report thehlut dawn

Supreme Court-in loneituten an dodal mek, farm law thar pathum chungchang buaipui tura committee a din chuan stakeholder hrang hrangte meeting a neihpui hnuah final report tur a duang mek a, March 20-ah court-ah thehluh hman a tum. 

A tirah panel  member atan hian mi pali ruat an ni a, mahse ruat zinga pakhat BKU hruiatu Bhupinder Singh Mann chu ni hnih hnuah a inhnuhdawh leh avangin member pathum - Dr Ashok Gulati, Dr Pramod Joshi leh Anil Ghanwat-te an ni ta a ni. 

Expert panel hian January 19 khan NASC complex-ah a hmasa ber atan video conferencing kaltlangin meeting an nei a, meeting hnuhnung ber chu February 23 khan neiin, All India Kisan Coordination Committee (AIKCC) office-bearer-te chu farm law chungchanga an ngaihdante an zawt a ni. February 19 khan sorkar laipui aiawhte chu panel hmaah hian inlanin, anni pawhin farm law an ngaihdante an hrilh. Panel hian sorkar laipui aiawhte bakah state leh UT 18 aiawhte an hmu bawk. 

Hetih lai hian thla thum chuang Delhi border-a farm law thar duh lohna lantir mek, loneitu pawl Sanyuk Kisan Morcha chuan panel-a sorkar laipui leh loneitute inkara inhriathiam lohna awm mek chu chinfel dan tura a sawi chu an pawm lo tih a sawi. Sanyuk Kisan Morcha chuan farm law tharte hi siamṭhat an pawm lo tih sawiin, a vaiia hnawl vek an phut tih an lo sawi tawh a ni.