NEWS TAWI

New Zealand prime minister leh foreign affairs minister ni bawk Winston Peters chu Thawhlehni khan India a rawn thleng a, ni li a cham ang.

Nimin khan IIT Delhi-a  New Zealand Centre hawnnah a tel hnuah Indian Council of World Affairs-ah thu a sawi a, nimin tlaiah khan external affairs minister Dr S Jaishankar a kawm bawk. Vawiin hian Delhi chief minister Arvind Kejriwal a hmu leh dawn a, chumi hnuah Mumbai panin, naktuk hian Bombay Stock Exchange-ah hun a hmang dawn bawk a ni.

Myanmar president U Win Myint pawhin nimin chawhnu lam khan India a rawn thleng ve bawk a, ani pawh hi ni li tho a cham ang. First Lady Daw Cho Cho chuan rawn ṭawiawmin nimin vek khan New Delhi-a   Akshardham temple an tlawh nghal a ni. 

Vawiin hian Rashtrapati Bhavan-ah hun an hmang dawn a, Raj Ghat-ah Mahatma Gandhi zahna an hlan bawk ang. Prime minister Narendra Modi pawh inbiakna a neihpui ang. PM Modi nen hian inremna hrang hrang an ziah rin a ni a, president Ram Nath Kovind pawh a hmu dawn bawk.

Balakot air strike champha-ah IAF-te fak   

Indian Air Force (IAF)-ten nikum February 26-a Pakistan-a Balakot hmuna Jaish-e-Mohammed (JeM) firfiakte awmnaa air strike an neih chu  IAF-in kum 40 chhunga a hnathawh pawimawh berte zinga mi a nih thu Air Chief Marshal Rakesh Singh Bhadauria chuan a sawi.

Balakot hmuna IAF-ten air strike an neih chhan hi nikum February 14-a Jammu & Kahsmir-a Pulwama hmuna JeM firfiak pakhatin thihchilh bomb hmanga Central Reserve Police Force (CRPF) convoy a beih avanga sipai 40 an thihna phuba lakna a ni.

IAF te chuan Mirage 2000 jet 12 hmangin Balakot-a JeM camp an bei a, jet-te hian hmanrua leh ralthuam ṭha ber ber chi SPICE 2000 & Popeye precision-guided munition, Sukhoi Su-30MKI, Netra leh Phalcon airborne-te pawh an pai a ni. Kum 1972-a Indo-Pakistani War hnua India-in ramri kana mi a beih lehna hmasa ber a ni.   

 

Pakistan lam hian Balakot beih a nih tuk February 27-ah khan India jet fighter pakhat, MiG-21 Bison fighter plane an kahthlak thu tarlangin, pilot Wing Commander Abhinandan Varthaman an hreng zui bawk. Ram pahnihte inbiak remna avangin nikum March 1 khan pilot hi chhuah leh a ni a, India a lo thlen hnu hian Vir Chakra award hlan a ni.