SC-in Kashmiri zirlaite venghim turin state-te hriattir

Supreme Court chuan nimin khan sorkar laipui leh state 10-te hnenah hriattirna pein, Jammu and Kashmir-a CRPF convoy beih a nih hnuah Kashmir mi zirlaite chu beih leh tihnawmnah an tawhna tur lakah veng turin a hriattir. 

Court-in hriattirna a pekte hi sorkar laipui bakah Jammu and Kashmir, Uttarakhand, Haryana, Uttar Pradesh, Bihar, Meghalaya, Chhattisgarh, West Bengal, Punjab leh Maharashtra state-te an ni.  State 10 chief secretary, DGP leh Delhi Police hotu hnenah Kashmir mi emaw, hnam tlem zawkte emaw beihna thleng a awm chuan rang taka action la nghal turin a ti. Pulwama attack kaihhnawiha Kashmiri zirlaite beihna thleng chungchang buaipui tur hian a hmaa mob-lynching case buaipui tura dah nodal officer-te chu dah chhunzawm nghal an ni bawk. 

Chief Justice of India Ranjan Gogoi leh Jutices LN Rao bakah Sanjiv Khanan awmna bench chuan Ningani khan senior advocate Colin Gonsalves-an Pulwama attack thlen hnuah ram chhung hmun hrang hrangah Kashmir mi, a bikin zirlaite himna chungchang ngaihtuah thuai a ṭul thu a thehluh chu an ngaihtuah a ni. Gonsalves hian petition thehluttu Tariq Adeeb hmingin he ngenna hi a siam a ni. 

Supreme Court-a petition thehluhah hian February 14-a Pulwama-a CRPF convoy  beih a nih hnuah ramchhung hmun hrang hrangah Kashmir zirlaite beihna a thleng niin a sawi a ni. State danga awm, Jammu and Kashmir zirlaite chu hlauthawng reng rengin an awm a, hei vang hian an himna ngaihtuah sak a ngaih thu a sawi. Kashmir mite beihna thleng avang hian Kashmiri zirlai, sumdawng, hnathawka awm leh state danga pem eng emaw zat chu Pulwama attack thlen hnu hian Jammu and Kashmir lamah an tlanchhe haw nia sawi a ni.