Delhi-a buaina chhuakah mi 22 an thi

Delhi hmarchhak lam, Jafrabad, Maujpur, Bhajanpura, Jamia Nagar leh Seelampur biala buaina chhuak vanga thi chu nimin thleng khan mi 22 an tling tawh. Thi zingah hian police pakhat a tel.  Buaina chhuak vang hian mi 200 vel an hliam tawh bawk a ni. 

Pathianni aṭang khan Delhi hmar­chhak bialah hian  Citizenship Amendment Act (CAA) duh lohna lantir a ni a, CAA thlawptute leh dodaltute inkarah buaina hi a chhuak zui a ni. Buaina chhuak vang hian Thawhlehni khan CrPc Section 144 puan a ni a, mahse hei hian awmzia a nei zui lo. 

Nimin khan pawl pahnihte hi lung leh hmanraw dangin nasa takin an intawng chhunzawm leh a, bungrua te tichhiain an hal bawk. Police-te chuan buaina chhuak hi thunun tum mah se an dang thei lo a ni. 

Delhi khawpuia tharum thawhna thleng chungchangah, Supreme Court leh Delhi High Court chuan Delhi Police-te hnathawh dana an lawm loh thu an sawi. Supreme court chuan police-te chu an eizawnna hrechiang tawk lohah a puh a, Delhi High Court pawhin buaina chhuak chuan zual lam a pan zel tih a sawi bawk. 

Delhi High court chuan mipuite himna  ngaihtuah tur te, khawpuia buaina chhuak tuartute ṭanpuina tura helpline siam tur leh, private ambulance pawh a ṭul apianga hman tura chhawp turin sorkar a hriattir. Hei bakah hian intihbuaina thleng vanga harsatna tawkte awmna tur ngaihtuah a, an mamawhte ngaihtuah sak turin a ti bawk. 

Buaina chhuahna hmun hi India rama venhim uluk ber, Raisina Hill aṭanga km 10 chauha hlaa awm a ni. Rasina Hill hi Parliament House, Rashtrapati Bhavan, Prime Minister Office, bakah defence leh home ministry-te awmna a ni. 

Hetianga hmun pawimawh leh venhim uluk berna hmun aṭanga hla lo teah buaina nasa tak hi chhuakin, mi 22 in nunna an chan phah tawh a ni. Raisina Hill aṭanga hla vak loah hian Indian Army, Indian Air Force leh Indian Navy-te headquarters a awm bawk.

Delhi chief minister Arvind Kejriwal chuan boruak chuan ṭhat loh lam a pan zel nia sawiin a hlauhthawnawm tawh hle tih a sawi. AAP hruaitu, Sanjay Singh leh Gopal Rai-te chuan buaina chhuak thunun a nih theih nan Delhi hmarchhak bialah sipai dah lut turin sorkar laipui an ngen. 

Prime minister Naren­dra Modi chuan nimin khan Delhi mipuite chu boruak ṭha leh muanawm siam turin a ngen. PM ho hian nimin khan Delhi  khawpuia tharum thawhna nasa tak thleng chungchang ngaihtuahin Cabinet Committee on Security meeting pawh a neih a ni bawk. 

National Security Advisor Ajit Doval chuan Thawhlehni zan khan buaina chhuahna hmunte hi a tlawh kual a, police officer-te a kawm kual bawk. Doval hian Seelampur, Jafrabad, Maujpur leh Gokukpuri Chowk te a tlawh a, boruak ṭha a awm a, dan leh thupek kenkawh a nih theih dante a enpui a ni.